Taylor Swift – Speak Now World Tour Live 藍光碟評

2012年02月22日2014年07月20日小瑟藍光碟評

去左 HMV 行左轉，見到佢地既電視上播緊呢排聽得好密下既美國靚女歌手 Taylor Swift – Speak Now World Tour Live，二話不就說去左櫃檯問佢呢個演唱會既 BLU-RAY 出左未，一問之下, 店員非常禮貌地帶左小瑟去貨架度，拿出呢隻 Taylor Swift 既首次藍光演唱會, 一睇…….下，唔係卦，只係 HKD$169 蚊，二話不就，就囉上手死人都唔放，而係佢隔離，仲有美同樂壇頂級天后裡 Lady GaGa，一看之下，唔係卦，又係 HKD$169 有交易?? 真係唔好講野，立埋!!

而今次小瑟想先同大家分享下呢隻 Taylor Swift – Speak Now World Tour Live 先，因為佢既歌小瑟相對聽得比較多，原因好簡單，簡單易上口，睇佢既演出亦非常討好的，始終都係靚女一名麻^^，平時小瑟好小聽外國歌，而之所以會識佢，完全係因為老婆介紹，而最攪野係，小瑟聽左好耐其實都唔知唱歌者其實就係呢個靚女，事關一路都以後佢係唱民歌，以為係歐水強果隻，但其實小瑟好想話比大家知，其實佢係唱 POP Sound 架，而佢既歌仲有好多真係好好聽，唱功亦非常了得，唱現場真係同 CD 水準差唔幾，又識彈返二野結他，彈下鋼琴咁，真係能歌善舞，唔好話時下後生仔喜愛既偶像，就連小瑟都 like 左佢既 Facebook，你都咪話小瑟係 76 老餅。

藍光數據

從電腦既數據上得知，呢隻碟既數據容量只有 18.6GB，換句話來講，呢隻即係只係一隻單面單層的 BD25 藍光，咁樣係咪即係等於好差呢?? 以下就同大家分享一下。

選單畫面

畫面質素

講返呢隻藍光碟先，呢個 LIVE 係以百老匯式舞台風格做主題，而演唱會中既畫面風格，就亦都以色彩鮮艷為主Tone，另人睇時感覺就好似睇緊百老匯的歌舞劇咁，不過就因為有左呢Ｄ特效，呢個演唱會既畫面就絕對唔係平時大家欣賞到既傳統高清畫質勒，真實畫面係點，聽小瑟講不如自己親眼睇啦！！（所有截圖可點擊放大至高清畫質）

聲音表現
呢隻碟既聲軌只有二條，一條係 PCM 2.0 音軌，而另一條就只提供 DD5.1舊制式的音軌，由此可見，呢隻碟點解可以用 BD25 去收納哂咁多既內容啦。不過又話分二頭，咁係咪代表唔好聲，聲衰呢?? 當然唔係啦，不過以流行歌手來講，音質的確係比較唔會用太多心機去處理的，但整體來講，呢隻碟既音樂部份，都比好多香港所謂的高清音效演唱會來得清晰，自然，平衡。小瑟就可以將整個演唱會原原本本咁由頭＂聽＂到尾而沒半點耳倦的感覺呢!!!

特別一提
呢隻碟內，值得一提既野真係多，例如碟內既特別收錄，有由 Taylor Swift 一歲開始既成長片段，佢幾時開始收第一件結他禮物，點解會有興趣玩音樂，第一次出席音樂典禮，入錄音室，表演，好多好珍貴既片段都會收錄，如果你都好似小瑟咁，對呢位只有 21 歲，前途無限既公主歌手有興趣的，你絕對要睇埋。

而演唱會中，你又會見到佢既 FANS 竟然大比數係以女仔為主，男仔什小，而佢亦都非常之唔怕 FANS 熱情既＂招待＂，佢會係演唱會中，唱唱下歌係前台，一路行去觀眾席條路 (當然係有一條路比佢行去啦!) 行去觀眾席中心地帶，再去獻唱比大家聽。呢點真係亦小瑟不能相信佢的親切性格係可以如此盡的。難得難得!!

但此碟有一點非常奇怪，就係冇左 POP-UP MENU 功能，即係話我唔可以睇睇下之後按個 POP MENU既制，去叫出選歌單去選歌，如果我要選歌，只可以出返 MAIN MENU 去選，天呀，呢個藍光碟既基本功能，點解可以冇左架??????

我明白到，呢隻碟之所以定價為 HKD$169 蚊，係真係有原因的，不過我絕對唔覺得入錯貨，反而，我非常之高興可以只需要 HKD$16 蚊就可以擁有呢隻藍光演唱會，但如果我加多 10 蚊可以有埋 POP-UP MENU 的話，呢 10 蚊我絕對會比呢!!!! XDDDD