【入圍亞定分享】玩家試玩第二彈 – QED Reference HDMI 線

2013年度第一擊【玩家試玩第二彈 – QED Reference HDMI 線 – 終極賽果公告】活動已經公佈了得獎賽果, 四位參加者都比盡心機去將分享呢條QED既第一身試玩感覺寫在報告中同大家分享,四位終極玩家交黎既報告水準之高,絕對係發燒級既報告,有用測試工具的數據分折,有用不同器材反覆測試既第一身感受分享,由今日開始,我地就會一連四日,在新聞中心的頭條內,向各位轉載返當日四位參加者的用後分享,首先第一位係入圍參加者"阿定"既分享文章。

—————————————————————————————————————————————

作者:阿定

首先多謝 Post76.com 同 ECT 代理 抽中小弟試玩呢條 QED Reference HDMI Cable,初初玩AV時,都有追過唔同品牌的HDMI Cable,唯獨QED未玩過,反而家中十仔係用緊QED,都好滿意,所以今次有得試玩QED的HDMI Cable,二話不說就即時報名了!

收到貨到今日呢個分享,玩左大約一星期,以下會分幾Part同大家講下試用感,我自問唔係咩專家,亦唔係咩高級器材去試,所以大家唔好見笑就是了!

先來講講包裝,話晒係Reference 級別,果盒真係好型,盒上宣傳重點有三樣,High Speed with ETHERNET,即係所謂的1.4,3D 1080P,亦係我測試重點,最後係Ultra Low Jitter

QEDCablewithBox

拆開果盒,非常簡約,就咁Cable 一條,說明書(紙)一張,做工非常精細

QEDCable

QED呢條Cable有分頭尾,非常細心地話你知邊一邊插去電視,非常唔錯

QEDCableTVout

包裝呢d野,講多無謂,先講下我主力想測試的3D功能,特別拿了 LG 的宣傳碟來試,唔用阿凡達、Cars2來試,係因為呢隻LG出的宣傳碟真係好靚,好堅,百看不厭,絕對可以試出真功夫,加上我用緊 LG 電視,無理由唔用番專用的測試碟來試!

LG20132nd3DDEMO

下面會出現的相,都係比大家參考用而己,一來影相無咩意思,二來畫面係3D的,我係關左3D來影的,所以無參考作用!首先RESET番我的原廠isf mode,你無睇錯,LG係有isf mode的,所以測試時出的畫面,唔會係我個人喜好,較光左,較鮮左的味精畫面,係導演想比你睇的畫面!先來的係我用緊的 TTL TTL Tru AVE 3D HDMI1.4 Cable 畫面,TTL比我的感覺係味精少,所以我多數睇碟都係用佢

QEDLG

再來就當然係換上今次的主角QED Reference HDMI Cable 去我部Sony S790 Blu-Ray機啦,隔離條Wireworld用來出聲的,現階段可以不理!

QEDwithBDP

下面就係換上QED後的畫面,就咁睇同上面果張分別不大吧,所以就讓我講講感受吧,顏色比之前鮮豔左少少,唔算多,層次一樣分明,3D效果比之前感覺實淨,老實講,分別不大,就算有,都係鮮豔左2-3%吧,當然,同一隻碟我試過其他100-500蚊價位的線睇過,明顯係一分錢一分貨,平價線的色水係會有d怪的,有d會光d有d會過份地鮮,無左層次感

QEDLG

試完3D,當然要試2D,找了畫面我最唔滿意的Star Light 容祖兒演唱會,畫面雜訊有少量改善,感覺滿意,黑位表演亦唔錯

QEDJOEY

之後再試試 BatMan The Dark Knight Rises,畫面同色調都好好,唔會太光或太暗,戲入面要交代的灰暗感覺亦如實表現出來,整體讓人滿意

QEDBATMAN

除左以上的碟之外,老實講,得一個星期,真係試唔到d咩野,當然,難得有靚線玩,我當然唔會放過用盡去,就係用來比MagicTV駁電視睇啦,雖然LG係內置數碼電視,但始終唔夠MagicTV靚,所以我多數用MagicTV睇電視,呢一個星期,我都有用佢來睇電視,效果比我以往用過的100-500價位Cable都好,畫面清晰d,顏色鮮豔d,如果只係用緊跟機HDMI線或平價HDMI線,可以一入,絕對唔會失望,推薦使用大電視的朋友使用,特別係3D用家,我個人用時發覺睇得清左的3D畫面,應該有大原因係Ultra Low Jitter 的功能,Data loss同Jitter time好有關連,3D要求數據大,絕對會有所幫助!

my home

音效方面,因為時間關系今次無特別去試,主要就是畫面方面的測試,希望幫到大家,整體我給8/10分,性價比來說就有9/10分,值得有能力買補品的師兄!

—————————————————————————————————————————————

歡迎進入我們的影音玩樂討論區發表意見.

https://post76.hk/news/?p=35584

https://post76.hk/forum.php?mod=viewthread&tid=148211

阿定報告討論帖
https://post76.hk/forum.php?mod=viewthread&tid=149112&fromuid=4

*** 溫馨提示:想更緊貼更多影音界的最新資訊,請到以下的 Facebook 專頁按「讚好」 Google+ 專頁按「加到社交圈」加入我們,每天就會收到全新的中文影音免費資訊呢!! ***


🏠 ★ Post76網店經已開幕 《store.post76.hk》

小瑟

關於小瑟

一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台, Post76玩樂網.

觀看所有 小瑟 的文章 - 網站

相關文章