麻甩熊仔爆笑回歸 -《賤熊 2》今日上架

上集《賤熊30》一出全球勁Like,全因劇情離經叛道敢作敢為,擺明車馬大玩不文笑料;今次續集強勢回歸,直頭奉旨Cheap多兩錢重,粗口橫飛連珠炮發不在話下,部份意識不良挑戰III級邊界,偏偏男女觀眾都笑到Gap Gap聲,單是香港票房就輕鬆超越前作,埋單接近$3000萬!《賤熊2》全新卡士組合甚有新鮮感,故事講述阿尊﹙麥克華堡﹚經已同前度﹙米娜古妮絲 Mila Kunis﹚離婚半年,變返單身寡佬後性生活嚴重失調,適逢泰迪要打官司爭取「人」權,間接令死黨邂逅索女律師心美﹙雅曼達施菲﹚,她集美貌、智慧及「壞習慣」於一身,旅程中與阿尊志同道合越黐越埋,仲齊齊飛車、隊草、曬月光,簡直浪漫到震!

Cheap 破道德底線

本片亦邀來幾位特級「串」星,包括老、中、青影迷通殺的演技派、於戲中扮演著名律師的摩根費曼﹙Morgan Freeman﹚,以及早在導演另一套喜劇《奪命西》﹙A Million Ways to Die in the West﹚登場的里安尼遜﹙Liam Neeson﹚,這位在《救參96小時》﹙Taken﹚系列儆惡懲奸的大英雄,會將他最神經質一面發揮到極致,失驚無神玩轉泰迪打工的街坊超市!至於泰迪和阿尊的兒時偶像 – 《飛俠哥頓》﹙Flash Gordon﹚森姆鍾斯﹙Sam Jones﹚,今集依舊是瞓身搞笑的鐵膽,癲喪行為比起兩個小Fans,絕對有過之而無不及……

《賤熊2》BLU-RAY及DVD已隆重上市,無論一大班Friend圍埋笑餐飽,定攬實愛人共建暖Love Love私人影院,同樣啱Feel啱Channel!

Ted 2 BD (3d packshot)


🙋‍ ★ 想睇版友討論以上文章?? 《點我進入討論》

🏠 ★ Post76網店經已開幕 《store.post76.hk》

Post76 Reporter

關於Post76 Reporter

身為76戰地記者, 人玩我又玩, 人唔玩我都要玩, 咁先係76新聞, 事事上心, 願天下毒物都任我們76記者任玩任試.

觀看所有 Post76 Reporter 的文章

相關文章