[定の影評] 讓漫迷淚奔的改編電影 - 《進撃的巨人》

阿定

由於七月尾去了東京旅行，所以特別對 《進撃的巨人》留意，日本的宣傳，可以話係鋪天蓋地，加上我本身就係一個漫迷，想第一日衝去睇的感覺就更加大了！

今次香港發行，可以話係做得唔錯，好少日本電影可以係香港同日本上映的同一日上優先場，一般都係遲一個月已經叫早的了，可能同今次《進撃的巨人》主打海外有關吧，不過好可惜，發行捉到鹿唔識脫角，我唔肯定係咪港版Cut左，但從電影最重頭的打鬥戲經常無故唔見左d畫面，我絕對相信Cut得都幾嚴重！如果係為吸引18歲以下少年入場，我唔明點解唔學寄生獸咁，分IIB同III級兩個版本上映！

電影係改篇自同名漫畫應該唔駛太多介紹吧，我相信如果有睇開漫畫或動畫的話，應該最想知的，就係改動有幾大，簡單d講，我會建議大家當係兩套完全唔同的作品來看待會比較好，不過我相信除非你無睇過原著，否則都幾難代入新的設定入面！

以下Quote了的都是劇透，如果唔想被劇透，請直接跳去尾，睇總結

老實講，電影改到不倫不類，世界觀改左，由疑似中世紀變成失去科技的未來世界，攪到成件事更無說服力，試想想曾經有飛彈的世界，點可能會比巨人統治到

你唔睇原著，都應該知道日本漫畫最鐘意講友情，團結，亦係原著漫畫最吸引人的其中之一，電影入面，無晒，友情、團結，咩都無，變成真實的戰爭世界，入軍隊就係為溫飽，但求有餐飯食

人物性格，完全唔跟，女角原本對主角係一條心呢個設定，漫畫都無刻意交待呢條係愛情線，但來到電影版，變成四角戀，一開始就講明佢地係戀人的身份，女角由保護男主的女強人，變成弱小的女孩子，三個主角由青梅竹馬，變成一對戀人加一個閒人，天呀，你叫人如何接受，疑似最強的兵長的角色，由型男，改成變態，仲要無端端加插同女角的相擁食蘋果噁心片段，再加上不必要的鹽花，我以為睇緊Cult片

不合理的情節其實一般都會因為係睇緊戲而被接受，但連戲入面自己講的設定，都可以係兩分鐘內無視掉，就完全不能接受，呢頭講完唔好出聲，唔好開燈，果頭就一路大叫，一路四圍用燈照

說到這裡，係咪開始覺得唔對路呢？睇得巨人，你係咪預左會好血腥，好暴力，媽媽被殺那情景，有夠經典了吧，我可以同你講，無晒，係有血腥，係有暴力，但唔係你意料之內的少，係少得可惡的少，如果你有睇寄生獸，我可以話，同寄生獸比，呢套只係BB級，睇寄生獸時雖然都仍未滿足到我，但都會聽到場內不少女士尖叫，但呢套，就連睇動畫都頂唔到的定太，都話OK啦，未至於接受唔到，你就知，有幾咁唔血腥，咁究竟係被香港Cut左，定原本就係咁，相信只有真正13號上映時，片商有幸聽到大家的怨氣，重新決定變返III級版上畫，加上有人送飛比我，而我又剛好有時間去睇，否則我應該呢世都唔會知，因為比多次錢去睇的話，Sorry, No Way!

咁成套戲，又係咪咁唔可取？咁又未必，雖然我一路睇，一路小，但真係無悶場，拍攝手法係唔差的，大部份主要角色都做得唔錯，先唔好講人設被改動難以接受，米卡沙，漢吉，呢兩位女角都真係幾入型入格，而其它主要配角，都令人印象深刻，不過阿爾敏呢個原著的第二男主角變成路人甲，真係好失望！

電影特效方面，機動裝置的飛來飛去，算做得唔錯，不過角度太少加上出現次數不高，唔夠痛快，期待下集會有更多戰鬥場面，而巨人的描寫，就同一般的特攝片差不多，可能由真人扮的關系，全部都好日本人樣，而艾倫巨人出場後的戰鬥畫面，開始變得精細，明顯重本製作，不過都係果句，香港版應該Cut左唔少，真係大打折扣，整體來講，只要唔好同美國電影比，其實都唔錯的！

總結: 如果好似我咁，睇過漫畫，或真係好迷《進撃的巨人》漫畫，入場前最好先打定個底，日本有唔少人比低分劣評，絕對係有原因的，但如果你好似定太咁，只係去過環球影城影下巨人，只係睇過下《進撃的巨人》原著的簡介，對原著認識接近零的話，呢套片其實唔太差，無悶場，都值得一睇的！不過老實講，如果你係巨人迷，如何劣評都會好似我咁入場睇的了，老實講，下集我都會入場追埋來睇，問題只係一出即睇，定等星期日去睇早場時先去睇的分別而己！

P.S.: 感謝著名博客劍心搞的觀影團

alleelarry

我同定太一樣無認真睇過動漫畫，電影照搬係咪一件好事，其實幾難下定論！
(Post76 Android 手機版送出)

阿定

alleelarry 發表於 2015-8-3 16:51
我同定太一樣無認真睇過動漫畫，電影照搬係咪一件好事，其實幾難下定論！
(Post76 Android 手機版送出) ...

無情意結的情況去睇，可以比70-80分呢套戲，預計海外票房應該會唔錯，相反日本同東南亞要有高票房，我唔太睇好！
(Post76 Android 手機版送出)

alleelarry

阿定 發表於 2015-8-3 17:14
無情意結的情況去睇，可以比70-80分呢套戲，預計海外票房應該會唔錯，相反日本同東南亞要有高票房，我唔 ...

電影看來十分看重外國市場，或許如此就得把故事設定反過來才贏得票房吧！

vinsckan

作為巨人迷其實都幾中意呢套戲，透過電腦特效所呈現出黎既巨人其實相當之有震撼力。所以我覺得〈巨人〉呢套戲其中一個吸引之處就係欣賞佢既電腦特效為帶黎既視覺衝擊

mike384

冇睇過原著漫畫, 有睇過動畫, 初初係被動畫的高質素所吸引, 但個故仔同人物太[刻意地]重口味, 唔係自己杯茶, 好似二十集前後就冇跟了.
電影版的世界觀, 好幾個月前, 從個張揸RPG的海報中已經估到, 末世好拍好多, 背景道具都唔駛太考究, 雖然話原著的世界觀係類似工業革命前後的, 但都會要好多心機去還原.
將一個咁大的作品縮到兩個鐘本來就唔係易事, 記得最近睇的兩套日本漫畫改編電影, 一套係今年的雷朋三世, 另一套再耐少少, 七金剛.
老實講, 兩套都好差...世界觀還好, 但主角變了第個人咁...尤其係七金剛...唉

alleelarry

vinsckan 發表於 2015-8-4 09:40
作為巨人迷其實都幾中意呢套戲，透過電腦特效所呈現出黎既巨人其實相當之有震撼力。所以我覺得〈巨人〉呢套 ...

日本人也未必接受到，版友的包容度真的不是大家所能理解得到！
(Post76 Android 手機版送出)

alleelarry

mike384 發表於 2015-8-4 09:50
冇睇過原著漫畫, 有睇過動畫, 初初係被動畫的高質素所吸引, 但個故仔同人物太[刻意地]重口味, 唔係自己杯茶 ...

漫畫睇左半本，動畫睇左六、七集……，全因接受唔到Ｄ設定！
(Post76 Android 手機版送出)

阿定

vinsckan 發表於 2015-8-4 09:40
作為巨人迷其實都幾中意呢套戲，透過電腦特效所呈現出黎既巨人其實相當之有震撼力。所以我覺得〈巨人〉呢套 ...

咁公平d講，巨人攻城果幕係唔錯的，震撼力十足，我亦係因為係日本睇過IMAX版的《巨人》片頭，而被深深吸引，所以買飛入場睇，不過香港只係得普通院，無IMAX，無4DX，如果大家只係去細院睇的話，以睇特效來講，真係有點可惜！

粗人敵卡

只睇過動畫
對套戲無乜信心，所以等一輪得閒先睇